Grenivíkurskóli sigurvegari í lestrarkeppni grunnskólanna

Valdimar Víðisson, fyrrverandi skólastjóri Grenivíkurskóla, tók við verðlaununum fyrir hönd skólans
Valdimar Víðisson, fyrrverandi skólastjóri Grenivíkurskóla, tók við verðlaununum fyrir hönd skólans

Grenivíkurskóli bar sigur úr býtum í C-flokki í lestrarkeppni grunnskólanna sem Samrómur stóð fyrir, en keppnin stóð yfir frá 18.-25. janúar. Úrslitin voru tilkynnt við hátíðlega athöfn á Bessastöðum í gær og var það Valdimar Víðisson, fyrrverandi skólastjóri Grenivíkurskóli, sem tók á móti viðurkenningarskjali og verðlaunum fyrir hönd skólans. Nemendur, starfsfólk, aðstandendur og velunnarar skólans lásu samtals 129.075 setningar á einni viku sem verður að teljast ótrúlegur árangur. Einungis einn skóli á landinu las fleiri setningar, Smáraskóli, en sá skóli sigraði í B-flokki.

Keppnin í C-flokki var gríðarlega spennandi, en frá fyrsta degi var ljóst að tveir skólar þar voru staðráðnir í að sigra, Grenivíkurskóli og Höfðaskóli á Skagaströnd. Skólarnir skiptust á um að hafa forystu og ljóst að það var mikil hvatning fólgin í þessari spennandi keppni á milli skólanna. Svo fór að Grenivíkurskóli náði að síga nokkuð fram úr á síðustu dögum keppninnar og endaði með ágætt forskot í sínum flokki. Skólinn fékk að launum viðurkenningarskjal ásamt Sphero Bolt forritunarkúlum sem munu vafalaust nýtast vel.

Samrómur stóð fyrir keppninni, en á heimasíðunni samromur.is er verið að safna saman raddsýnum landsmanna með það fyrir augum að efla máltæknilausnir á íslensku og kenna tækjum og tólum að tala og skilja íslensku í hinum stafræna heimi. Sannarlega þarft framtak og gaman að geta lagt þessu verkefni lið.

Við í Grenivíkurskóla viljum þakka öllum þeim sem tóku þátt í keppninni fyrir hönd skólans kærlega fyrir sitt framlag. Þetta var afar spennandi og skemmtileg vika og frábært að sjá samheldnina og þrautseigjuna í okkar ágæta samfélagi.